Gudoomiyihii Maxkamadda Racfaanka ee Gobolka Hiiraan ee Maxkamadaha Islaamiga ayaa is casilay isagoona ka gaabsaday in uu faah faahin ka bixiyo sababaha uu isku casilay.

Shir jaraa’id oo uu saakay qadka Taleefanka ugu qabtay bahda Warbaahinta gobolka Hiiraan Sheekh Max’ed Max’uud Warsame gudoomiyha Maxkamadda Rafcanka ee gobolka Hiiraan ayaa waxaa uu ku shaaciyay shirkiisa jaraa’id in uu ka tanaasulay xilkii gudoomiyaha Maxkamadda Racfaanka ee gobolka Hiiraan sababo uu ku sheegay in xiligaani uusan ku shaqeyn Karin oo ay ugu horeyso xaaladda uu haatan marayo dalka gaar ahaan magaalada Baladweyne ee gobolka Hiiraan.

Waxaa uu sheegay sheekhu in ay jiraan dhibaatooyin fara badan oo soo foodsaray xiligaani kuwaasi oo uu ka gaabsaday in uu carabka ku dhifto,waxaana uu sheegay in haatan wixii ka dambeeya uu qabsan doono danihiisa gaarka ah maadaama markii hore uu ahaa nin daaci ah.

Ma’ahan Masuulkii ugu horeeyay ee iska casilay Xubin uu ka ahaa Maxkamadaha Islaamiga ee gobolka Hiiraan,waxana horay isku casilay gudoomiyihii Shuurada ee gobolka Hiiraan Sheekh Cumar Dhicis Diiriye gudoomiyihii Maaliyadda gobolka iyo gudoomiyihii degmada Baladweyne Jalibay.

Gudoomiyaha gobolka Hiiraan ee Maxkamadaha Islaamiga ee ku biiray dowladda KMG Soomaaliya oo dhowr jeer oo hore ka hadlay is casilaada ay samaynayaan xubnihii kala tirsanaa maamulka gobolka Hiiraan ayaa waxaa uu sheegay in aysan saamayn ku yeelan doonin howlahooda shaqo.